الكورة .. العندليب .. الله أكبر ..

من قديم الأزل استخدم المسلمون كلمة " الله أكبر " لتعينهم على الجهاد فى سبيل الله
واستخدمناها فى حرب أكتوبر .. وغنى عبد الحليم أغنية العبور اللى قال فيها ..
الله أكبر .. أذن وكبر .. وقول يارب النصرة تكبر
وشوية شوية إمتدت الله أكبر من الصلاة والجهاد إلى عبارة لتشجيع الفنان
واللى بيسمع أم كلثوم والعندليب هيسمع صوت الجمهور وهو بيقول الله أكبر واللهم صلى على حضرة النبى ( ص )
ودلوقتى اللى بيتفرج على ماتشات الكورة بينفعل وبرضه بيقول " الله أكبر " واللهم صلى ع النبى ( ص )
يعنى خرجت الله أكبر من نطاق الصلاة وتشجيع الجهاد إلى تشجيع الأغانى والكورة !
طب وهى الكورة حرام ؟
لعب الكورة فى حد ذاته مش حرام لأنه رياضة لكن مجرد التشجيع والتجارة هو ده اللى حرام
وبعد ماكان الشهيد هو الذى يقتل فى سبيل الله
بقى الشهيد فى عهد العندليب هو اللى يموت فداءً للمزة بتاعته
زى مابيقول فى أغنية قارئة الفنجان " ياولدى قد مات شهيداً من مات فداءً للمحبوب "
وطبعاً هو مابيقصدش بالمحبوب هنا وطنه ولا أهله ولا ماله
وبقى الشهيد فى عهدنا دلوقتى هو اللى يموت مدافعاً عن فريقه أو منتخبه
اللعيبة بيلعبوا وعينهم على سماسرة النوادى وتجار الإعلانات
واحنا شغلتنا نتفرج عليهم ونشوف اعلانتهم ونديهم فلوس
هو ايه اللى حصل ؟!
نفسى أعرف سبب الإهتمام الجامد بالكورة اليومين دول
وماحدش يقوللى الناس عندها كبت ومابتصدق تلاقى حاجة تفرحها
ده مش مبرر
اللى بيحصل دلوقتى تعدى مرحلة الفرحة
اللى احنا فيه ده أزمة أخلاقية بكل المقاييس
وأزمة تفاهة وهيافة بكل المعايير
كلنا شوفنا اللى حصل فى كل ماتش مصر كانت بتلعبه
الأعلام دى شىء ضرورى وكانت شغلانة بتكسب جامد جداً
وكل واحد جابله ترابيزة وشوية ألوان وبينادى ارسم وشجع
واللى حلق زيرو ورسم على دماغه كلها ووشه علم مصر
واللى عامل سكسوكة وانتوا شفتوا وعارفين
والبنات بترسم هى كمان قلب وفراشة وغيره
واشمعنى الولاد يعنى ؟ هما أحسن مننا ولا أحسن مننا ؟ !
ومسخرة على أعلى مستوى وتقليد أعمى من ضمن التقاليد للى بنشوفه بره
الكل بيسيب مصالحة وكأن الماتش ده واجب وطنى لابد منه
وعربيات رايحة وعربيات جاية والكل مرسوم عليه علم مصر ومكتوب يارب النصر لمصر
والمصيبة الكبيرة بقى ان الجامعة كان فيها شاشة عرض كبيرة والكل كان بيروح يتفرج
ولاد بنات أبهات أمهات أطفال .. مش مهم .. دا المنتخب بيلعب ياعم
وكل بنوته لابسة أحلى وأضيق وأقصر ماعندها وحاطة على وشها كل مايمكن أن يوُضع
رايحة تعمل ايه دى ؟!
تشجع ؟؟!!
لو حلفتللى ع المصحف مش هصدق
من امتى البنات كانوا بيشجعوا كورة ؟!
وترجع البيت الساعة 2 ولا حاجة ويقابلها أبوها كنتى فين يا فاجرة ؟
كنت بتفرج ع الماتش والله يابابا !
آآآآآه .. بحسب .. دا أنا طلعت غبى بشكل !
وبعدين يعنى ايه تشجيع الكورة ؟
يعنى تقول الله أكبر وهيه والله عليك والعب وباصى يمين ورجع ورى وخللى بالك وياحمار واقفل الزاوية وارفع بقى ...... ؟
هو ده التشجيع ؟
طيب إيه الإستفادة ؟
أنا بشبه مشاهدة مباريات الكورة دى زى مشاهدة الأفلام الإباحية
لو بتتفرج فى الإستاد بتدفع فلوس للتذاكر
لو بتتفرج فى القهوة بتدفع فلوس للمشاريب ( والشاى بيوصل 10 جنيه )
لو بتتفرج فى البيت بتدفع فلوس للقناة
يعنى فى كل الحالات إنت اللى خسران وعالفاضى
نوادى وفرق ولعيبة ومدربين وبرامج ومذعيين وفنانين .. كل دول بيكسبوا على قفا سيادتك
أنا قعدت بعد آخر ماتش فى الكاس مخصوص عشان اتفرج على اللى بيحصل
لقيت كله بيقول .. جدو جدو إوعى يجيلك جدو
ونكتة اتشهرت قوى كلكم عارفينها على جدو ده
وسمعت ناس بتقول " أ ـــــه .. أ ــــــــوه .. قال إيه عايزين ـــــــــــــــــــــــ
فين ؟ فى التلفزيون ! ومن مين ؟ من المصريين ! ليه ؟ فرحانين !
وبقية عبارات التشجيع والفرحة انتو عارفينها
وبقت الأغانى الوطنية لقمة عيش للفنانين والقنوات ودى أمثلة
أغنية بتقول " قاعدين ليه ماتقوموا ترقصوا "
وواحدة تانية بتقول " إدلع يا مصرى "
وتالتة بتقول " ومادام قلبنا كده على بعضنا نرضى ربنا والخير هيزيد "
وأغنية العندليب " صورة "
وأغنيته " الله أكبر "
" والله وعملوها الرجالة "
" وتعيشى يا مصر فى عزة ونصر "
" بلدنا فى القلوب متشالة "
" جربت تغنيلها "
وشرين ومحمد نور " بلدى "
ونانسى والجاسمى
بقت الكورة بترمز للتدين والوطنية والحب والرجولة والدلع والرقص !
والصفحة الأولى فى أى جريدة لازم تكون كورة
وأخبار بالبنط العريض زى " حسن شحاته يفرض السرية على التدريبات ! "
وتسأل أى واحد بعد الماتش " إيه شعورك ؟ "
يقولك أنا فرحان جداً وبحب مصر ومصر أم الدنيا برضه
حتى فى الراديو نفس الحكاية
وأى حد يعبر عن شعوره لازم يختم بألف مبروك يا معلم
وبقى حسن شحاته هو ملك إفريقيا
وتسأل أى لاعب يقولك " أنا بهدى الفوز لسيادة الرئيس "
طب ياخى مش أمك أولى ولا حتى أبوك .. على الأقل هما اللى ربوك
لا .. والريس يقولك إنه بيهدى الفوز للشعب المصرى !
طب إهديلهم شوية لحمة ولا شوية تعليم ولا شوية صحة ولا شوية مية ... !
ومبارك بجلالة قدره اللى مابيروحش مجلس الشعب غير كل خمس سنين مرة لقيناه هناك بعد اللى حصل فى السودان
وبيقول ..
" إن رعاية مواطنينا فى الخارج مسئولية الدولة .. لانقبل المساس بهم .. أو التطاول عليهم .. أو إمتهان كرامتهم "
ولقيته بيقول " إن كرامة المصريين من كرامة مصر ومصر لا تتهاون مع من يسىء لأبنائها "
والنبى شوفوا الكلام !!!
طب شوف المواطنين اللى فى الداخل الأول ولا اللى على الحدود اللى بينضربوا من اسرائيل كل شوية
ولا عشان دى الجزائر والتانية اسرائيل ؟

وفى الآخر أنا بهنى المعلم حسن شحاته وبهدى الفوز ده لسيادة الرئيس والشعب المصرى
وانا بحب مصر .. ومصر أم الدنيا وهتفضل أمها إن شاء الله .

مصر مش أمى ولا أم الدنيا ..

السلام عليكم ورحمة الله وبركاته


أنا ليه مابحبش كلمة " مصر ام الدنيا " ؟


الدنيا اللى احنا عايشين فيها دى عبارة عن 7 قارات
وعدد الدول اللى فيها أكتر من 230 دولة
هى دى الدنيا اللى أنا أقصدها
هل مصر بقى أم كل دول ؟!!!

مصر كانت بتساعد الدول العربية
لو قولنا إن مصر ساعدت الجزائر واليمن وسوريا والسودان وو
هنلاحظ إن دى كلها دول عربية وفعلاً ممكن نقول إن مصر كانت أم العرب
لحد ما الجامعة العربية اتنقلت من مصر لتونس سنة 1979 بعد كامب ديفيد
ومن بعدها فقدت مصر مكانتها ودورها الريادى بين العرب


( إحنا ) حاربنا أوروبا كلها وهزمنا الصليبيين والتتار
الحملات الصليبية بدأت فى أواخر الدولة الفاطمية وانتصر صلاح الدين وأسس الدولة الأيوبية اللى استمرت 80 سنة
والتتار كانوا فى عهد المماليك وانتصر عليهم قطز ونجح بيبرس من بعده إنه يرجع نظام الخلافة العباسية لكن مصر كانت تحت حكم المماليك
ومن أول الدولة الطولونية كان بيتم شراء المماليك وخاصة فى عهد " أحمد بن طولون " ووصل عددهم لـ 24 ألف
ومن بعد الطولونيين جه الإخشيديين وكان معظم الجيش من الأتراك
وبعدين الفاطميين وبرضه كانوا بيعتمدوا على السودان والمغاربة والترك وزاد عدد المماليك
ونفس الحكاية مع الأيوبيين كان معظم الجيش من الأتراك وبنوا ليهم المساكن فى جزيرة الروضة وبقى اسمهم بعدين المماليك البحرية
اللى عايز أقوله ..
إن ما ينفعش نقول إن إحنا ( مصر ) اللى انتصرنا لأن مش إحنا اللى كنا بنحارب
المصريين كانوا مجرد جنود فى المعارك وماكانش الإعتماد عليهم كلياً كمان
لكن نبدأ نقول ( إحنا ) بعد 52 لأن اللى كان بيحكمنا مصريين
وينفع نقول إن ( إحنا ) إنتصرنا فى أكتوبر لأن اللى كان بيقودنا مصريين واللى كان بيحارب مصريين وكان لصالح المصريين



الحضارة الفرعونية ..
الحضارة الفرعونية ماكانتش وحيدة فى العالم
كان فيه برضه حضارات تانية زى السومرية والبابلية والرومانية .......إلخ
وزى ما فيه أهرام فى مصر فيه سور الصين وحدائق بابل
غير إننا أصلاً مش فراعنة .. إحنا عرب !!
والدليل إننا مابنتكلمش هيروغليفى ولا بنلبس زى فرعونى ولا بنحنط ولا عارفين الهرم اتبنى ازاى
وإذا كنت عايز تبقى فرعونى .. يبقى سيب لغتك ودينك ولبسك وعاداتك وتقاليدك وثقافتك وبيتك وروح عيش فى المعابد والكهوف
وان كان هناك بعض المحاولات لإثبات فرعونية مصر وذلك من خلال ماتبذله الفنانة القديرة روبى مع مخرجها العظيم شريف صبرى
فى عملهم الرائع وهو كليب إبقى قابلنى حيث تمارس روبى مهنة الرقص الممتع وهى ترتدى الزى الفرعونى متخذة الأفعى رمزاً لها
لتقول أننا مازلنا فى فراعنة ومازلنا نعبد الأفعى ( معبود الوجه البحرى قبل توحيد مينا للقطرين )
ولكن الذى لا تعرفه روبى ومخرجها أن الفراعنة لم يتغنوا بالمصرية العامية ولم يرتدِ الفراعنة الكعب العالى
ولم تكن المرأة تجرأ بالقول لحبيبها " إبقى قابلنى " حيث كان الأب أو الأخ يحافظ على أهل بيته
وأيضاً لم تكن المرأة تجرأ بأن تقول للرجل " أنا بتحداك " حيث كان الرجل رجلاً ..
والمشكلة اننا بنتلزق بالفراعنة فى كل حاجة .. ومابنقلدهمش فى أى حاجة
وسموا منتخب مصر بمنتخب الفراعنة .. مع إن الفراعنة ماكانوش بيلعبوا كورة !
ودلوقتى عايزين يعملوا حزب اسمه حزب الفراعنة .. مع إن الفراعنة ماكانش عندهم نظام الأحزاب !
المفروض عشان نفتخر بحضارة نكون إمتداد ليها مش نبلط ونقول " إحنا الفراعنة ! " .. وبعدين يعنى ؟!!
أهلاً ياسيدى .. تشرفنا يا فرعونى .. أجدادك عاملين إيه ؟!



حاجة أخيرة بقى ..
إيه معنى إن دولة تحتل دولة تانية ؟
معناها إن الدولة إحتَلت أقوى من الدولة اللى أحتُلت
تعالوا بقى نشوف مصر إحتَلت مين وأُحتُلت من مين
بالنسبة لمصر إحتَلت مين ..
لو حد عرف مصر إحتَلت مين .. ممكن يقول
لكن بالنسبة لمصر أُحتُلت من مين .. التاريخ يقول
البطالمة ( الأسكندر الأكبر )
الرومان
الفرس
الرومان مرة تانية
دخلنا بعد كده فى العصر الإسلامى وكانت مصر ( ولاية ) إسلامية
الأيوبيين
المماليك ( بحرية وبرجية )
دخلنا بعدين تحت الحكم العثمانى
وجات علينا الحملة الفرنسية
وبعدين بريطانيا ساعدت العثمانيين وطلعوا الفرنسيين
وجه عهد محمد على
وبقت مصر مستعمرة بريطانية أثناء الحرب العالمية الأولى
واستمر عهد محمد على إلى أن غادر الملك فاروق البلاد الساعة 6.21 وخلفه إبنه أحمد فؤاد اللى كان عنده 6 شهور
وبعدين ألغى عبد الناصر النظام الملكى وانتهى عهد محمد على فى مصر
وخرج آخر جندى بريطانى من مصر 18 يونيو 56
جمال عبد الناصر أمم قناة السويس 26 يوليو 56
وفـ 29 أكتوبر 56 كان العدوان الثلاثى على مصر
فى 57 قرر عبد الناصر تمصير الإقتصاد المصرى ودخلنا مرحلة التمهيد لكارثة 67
والحرب اتأكدت بإغلاق عبد الناصر لمضايق تيران
وفعلاً الحرب حصلت وخدت اسرائيل سينا مننا فى 67
وقال عبد الناصر " إن ما أخذ بالقوة لا يسترد إلا بالقوة "
وبعدين فضلنا فى استنزاف لحد 73
وحاربنا فى 73 وخدنا سينا ( ومش عايز أقول ياريتنا ماخدناها )
هل بقى اللى مصر عملته من 73 لحد 2011 هو اللى كان مفروض أم الدنيا تعمله فى 38 سنة
دا حتى البنية الأساسية مش عارفين نعملها سواء مية شرب ولا صرف صحى ولا كهربا ولا تعليم ولا مستشفيات آدمية
وصلت مصر للقمة فى الفساد فى كل حاجة ..
رشوة
تجارة أعضاء
دعارة
مخدرات
إنتحارات
عطالة
مليون من أطفال الشوارع

بأمارة إيه بقى مصر أم الدنيا ؟

الحب فى الجامعة ..

إنتوا مش ملاحظين إن الكلام العاطفى والتعبيرات الرومانسية زادت قوى اليومين دول ؟
دى مش بس زادت دى رطرطت
حبيب قلبى .. روحى .. نور عينى .. واحشنى يا غالى .. إنت فين يا قمر .. والنعمة الشريفة بموت فيك
والكلام ده مش بس بيقوله راجل لست وست لراجل .. لا
دا دلوقتى راجل لراجل وست لست
وأى حد تقابله يقوم راذعك طقم حنية كده من غير أى مناسبة وساعات من غير سابق معرفة
الشىء الغريب إن شلال الكلام الحلو ده وتعبيرات الحب الفظيعة دى جاية فى وقت الحب فيه إنتهى تماماً
والناس ما بقيتش طايقة بعضها .. دا جزء سمعته من واحد مش عارف اسمه
طيب تعالوا مع بعض نعرف إيه هو الحب ؟
أحمد شوقى بيقصد إن الحب ماينفعش يتوصف ويقول ..
وما الحب إلا طاعةً وتجـــــاوب .. وإن أكثروا أوصافه والمعانيا
وما هو إلا العين بالعين تلتقـــى .. وإن نوعوا أسبابه والدواعيـــا
وعندى الهوى موصوفه لا صفاته .. وإذا سألونى ما الهوى قلت ما بيا
أحمد رجب بيقول .. الحب هو القدرة على الضعف مهما كنت قوياً وجباراً
وفى الاساطير الإغريقية أن إله الجنون أشفق على إله الحب كيوبيد عندما رآه معصوب العينين
فتقدم نحوه ليقوده من يده وهكذا أصبح الحب " أعمى يقوده مجنون "
الحب هو الحب .. من العصر الحجرى حتى عصر الليزر
اللوعة .. والدمعة .. والحنين .. والشوق .. والفرحة
والخوف .. وسهر الليل .. وتنهدات المساء
ولكن الذى يختلف من زمان إلى زمان هو أساليب الحب .. وتقاليد الحب
ووسائل إتصال المحبوب بالمحبوب
الحب إحترام متبادل .. والرجولة فروسية من أبرز سماتها إحترام المرأة .. دا رجب اللى بيقول برضه
طيب .. هل اللى بنشوفه فى الجامعة ده يدل على إحترام ؟
الإجابة .. لا الناهية والنافية
لا يمكن تكون البنت اللى لابسة بنطلون مقسم دى محترمة
ولا يمكن يكون الشاب اللى قاعد معاها ده عنده ذرة رجولة أو إحترام
وبالتالى بنشوف اللى بنشوفه دلوقتى فى الجامعة
وبما إنهم ما طبقوش أول قاعدة للحب وهى الإحترام
يبقى اللى بينهم ده مش حب .. لأنه لو بيحبها صحيح لايمكن يقبل يشوفها باللبس ده
أنا واحد من الناس لا تثيرنى أى بنت لابسة محزق بل بالعكس
بحتقرها وبقرف منها وما بحسش فيها أى أنوثة
م الآخر بعتبرها زى أخويا مهما حطت بودرة وروج وكحل ( ميك أب يعنى )
الفرق إن أخويا راجل وحافظ على رجولته
ومالبسش جيبة ولا سلسلة وحظاظة زى أشباه الرجال اللى بنشوفهم دلوقتى
لكن هى تنازلت عن أنوثتها ورقتها وقبلت تكون لا مؤاخذة فى اللفظ د
ودلوقتى بنشوف البنات مسقطة البنطلون يعنى مش الأشباه بس
ومين عارف ممكن بكرة نلاقيهم ماشيين بالحمالات زى بعض الأشباه برضه
وقوللى مهما تقوللى .. لا يمكن هقتنع إن فيه واحدة لابسة بنطلون أو أى حاجة محزقة تبقى محترمة
دول قال فيهم الشاعر
نساء كاسيــــــات عاريـات .. تجاهلن الشريعة فى علاهـا
تميل وتنثنى بالجسم عمداً .. وتزنى العين حتماً إن تراهـا
ورب البيت كالخنزير يمشى .. ورائها ويستجدى رضاها




اللى بيحصل فى الجامعة
نظرة بعدها إبتسامة
يبدأ الكلام أول ما يبدأ فى الدراسة .. المحاضرات والسكاشن والدكاترة والمعيدين
والفترة دى بتتسم بالإحترام الفائق والمحافظة على أدب الحوار والكلام يكون من بعيد لبعيد
بعد كده يبدأ الكلام عن الحياة العائلية
إنتى عندك كام أخ وكام أخت ووالدك شغال إيه وبتحبى إيه وما بتحبيش إيه
بتقضى يومك إزاى ؟
أقولك على حاجة ! إحكيللى من أول ما اتولدتى لحد ما قابلتينى
فى الفترة دى زى ما بيقول أحمد رجب بيحصل تغيير مؤقت فى السلوك
وكل من الطرفين بيقدم الكويس اللى عنده عشان يمثل على الطرف التانى
يعنى العصبى يبقى هادى .. والبخيل الكرم ينقح عليه .. وقليل الأدب لسانه سكره
وطبعاً كل شوية المسافات بتقل
وبعد ما كانوا بيكلموا بعض من على بعد متر دلوقتى بقوا لازقين جنب بعض
ودول المحترمين لكن فيه ناس بقى بتزودها شوية صغيرين
وتلاقى الروش ماسك إيدها أو ممكن يلعب فى شعرها أو تنام على صدره أو تحط رجلها على رجله
دا غير الضحكات السافلة اللى تحسسك إنك معدى على غرزة
دا غير بقى إن ثورة الموبايلات دلوقتى عملت شغل جامد
والشعار اللى ماشيين بيه " أغنيتك تعبر عن شخصيتك "
نلاقى اللى حاطط أغنية لتامر وعمر وشرين رنة لموبايله وممكن كمان لبعرور والليثى
بالإضافة طبعاً إن الموبايل ما بيفصلش من الأغانى طول القعدة
وسمعتى أغنية تامر الجديدة وهى تقوله وانت سمعت أغنية إليسا الجديدة
ياه دا انت حساس قوى .. وهو .. انتى اللى مشاعرك رقيقة
ياريت فيه كلمة تعبر ع اللى أنا حاسس بيه غير كلمة أحبك
عمرى ما تصورت إنى أحب واحدة بالشكل ده .. إزاى كنت عايش من غيرك
زى ما اكون بعرفك من عشرين سنة .. طول الليل بحلم بيكى
باحس دايماً إنى مسئول عنك .. أول مرة أقول كلمة أحبك لواحدة .. كلمة منك وأقاطع كل الناس
بصراحة كدبت على غيرك كتير بس مش قادر أكدب عليكى
وبدأت تحكيله بقى قصة حياتها وهذا ما تبرع فيه وبالتالى هو طبعاً هيحكيلها قصة حياته
ويبتدى مشوار كلام طويل قديم صرخ من كتر إستعماله أوله فى الكلية طبعاً
بعد كده حوالين الكلية
ثم فى نطاق الجامعة والحتت بقى اللى انتوا عارفينها ( وانا هنا بتكلم عن المنصورة )
شارع الحب والمكتب وتل أبيب وما خفى ومش مخفى كان أعظم
وبعد كده بتيجى مرحلة خارج الجامعة ع الكورنيش أو فى مركب فى النيل وكوبرى العشاق
وطبعاً جزيرة الورد
لكن الكلام مهما كان كتير بيخلص وبيدخلوا بعد كده فى فترة ملل
خاصة إذا قالتلك إن فيه واحد متقدمللى وأهلى ضاغطين عليا .. هتيجى تتقدم إمتى ؟
ولما يلاقى نفسه إتدبس بيخلع بروح فدائية ويقول
لو كان اللى متقدملك ده عاجبك وأهلك موافقين عليه خلاص وافقى
أنا مش أنانى وأهم حاجة عندى مصلحتك وراحتك وسعادتك .. واللى بيحب لازم يضحى
أما بقى لو ما كانش فيه حوار خطوبة بيبقى فيه حاجة تانية لو ليك فيها هتكمل
وبعد ما تخلص وتمل وتزهق هتقلبها وتشوف غيرها
ولو مالكش فيها يبقى هتقلبها برضه وتشوف غيرها
هو ده الحب فى الجامعة
عبارة عن إتنين بيقابلوا بعض وبيمضوا ضمنياً على عقد خداع زى ما بيقول رجب
يتعهد فيه كل طرف أن يخدع الآخر بالوهم الجميل
والطرف اللى يكشف الخداع الأول يا إما يفسخ العقد أو يقبل الهوان
إنت عشان تحب لازم تفكر فى حاجتين .. الأولى إيه معنى الحب ؟
والتانية .. ماذا قبل الحب ؟




مصطفى محمود ( رحمه الله ) بيقول
كل حياة حسية تحمل فى طياتها بذور اليأس
واللذات الجنسية تموت .. كما تموت بعض الحشرات ساعة التلقيح
وتحمل بذور فنائها فيها .. والشعور المتكرر بعد كل لذة هو العطش .. وعدم الإكتفاء
ثم العطش ثانية .. ثم العطش .. ثم التعب .. ثم اليأس من الشبع والراحة ثم الملل
أحبك .. هى الكلمة الجميلة الوحيدة التى يتحرك فيها الإنسان
ويفضل إمرأة بالذات .. يطلبها بالإسم .. ويعلن إرتياحه لوجوده معها
إنها الكلمة الوحيدة التى تتضمن حريته وإختياره ومزاجه وشخصيته
إنه يفتح بيته وقلبه ونفسه وروحه .. ويستقبل روحا أخرى .. ويستضيفها ويأتنس بها
وينتعش بها كما ينتعش بدخول الشمس إلى غرفته .. ويحضر معها بكل وجوده
بجسمه .. وطبيعته .. وعاطفته .. وعقله .. وثقافته
ويستمتع معها بهذا الحضور الكامل .. بلا كراهية .. بلا أنانية , بلا غيرة
والرجل لا يستطيع أن يبلغ هذه الدرجة من الحب إلا بعد الثلاثين
الرجل فى حبه الأول يكون أفلاطونيا خجولا .. وفيه حبه الثانى يكون شهوانيا جسورا
وفى حبه الثالث يكون عطوفا حنونا .. وهو فى هذه المرحلة يكون أحسن حبيب وأحسن زوج
ويقول أيضاً أن أسوأ ورطة نقع فيها هى أن يستحوذ علينا شىء جدا .. جدا
حتى الفرح حينما يستحوذ علينا جدا .. جدا ..فإنه يهزنا بما يشبه الحزن
نفرح والدموع تترقرق فى أعيننا
والحب جدا جدا .. هو حب مر غيور ملتهب أعمى ينقلب إلى كراهية وعداوة
المحب جدا .. جدا .. يكره حبيبته من كثرة حبه لها .. لأن حبه يكلفه ويرهقه ويؤرقه
فهو يتمنى لو أنها تعذبت وتألمت وتشردت مثله
يتمنى لو أنها كانت على شفا الموت وناداته .. لو أنها كانت تحترق ومدت له يديها لينقذها
لو أنها كانت تعبده حبا وهو يتمنع عليها .. لو أنها كانت تخلص له وهو يخونها
إن عذابه يجعل مخيلته تموج بصور العداوة .. والإنتقام .. والتشفى
قبل ما تحب لازم تسأل نفسك سؤالين
الأول .. هل شقتك وشغلك مستنيينك أول ما تتخرج ؟
التانى .. هل انت واثق إن اللى إنت حبيتها فى أولى وتانية هى نفسها هتفضل تحبها بعد ما تتخرج ؟
طيب لو انت نيتك صافية وناوى فعلاً على جواز بس قدامك 3 سنين مثلاً عشان تكون نفسك
هل إنت واثق إن اللى فى قلبك ليها مش هيتغير خلال الفترة دى ؟
مع العلم إنها هتبقى مستنياك ولو سيبتها يبقى انت راجل ندل
ولو إتجوزتها غصب عنك علاقتكم مش هتستمر
يا عم انت قفلتها فـ وشى والكلام اللى انت بتقوله ده مش واقعى
معروف إن اللى بيحب واحدة لازم يكلمها
هقولك هى دى الكذبة اللى الكل مصدقها وعايش بيها
وعشان كده حتى اللى كان بيحب بعد الكلام بيشوه حبه ده
وبيتقلب فى الآخر لحالة من الملل لأنه مفكر إن الحب مجرد مقابلة
الحب عمره ما كان كلام .. الحب إحساس .. وطالما مش متوفر فيك الشروط اللى فوق
يبقى أحسن حاجة تعملها إنك تحب بصمت .. عيش الحب بس بينك وبين نفسك
وصدقنى الإحساس هيغنيك عن الكلام والهمس واللمس
وعلى فكرة مافيش واحدة جميلة ومش جميلة .. أو واحدة ذكية والتانية غبية
لكن فيه واحدة تحبها فهتكون هى الأجمل والأذكى والأرقى والأشد سحراً
انا بقول كده لأنى عارف إن الحب مش إختيار
وعشان لو حبيت تفكر مليون مرة
قبل ما تخللى الحب ده ياخد الطريق اللى إحنا بنشوفه فى الجامعة دلوقتى

حكاية طالب الكلية ..

هحكى ليكم حكاية طالب
حلمه فى الإبتدائى إنه يطلع الأول ويدخل إعداديه
وحلمه فى الإعدادى انه يدخل ثانويه
وحلمه فى الثانوية إنه يجيب مجموع يدخله الكليه
طالب من أول ما دخل المدرسة مش عارف هو بيدرس إيه ولا ليه وعشان إيه
كل اللى بيعمله إنه يحفظ عشان يدخل يطرش اللى حفظه فى ورقة الإجابة النهائيه
طالب لقى التعليم فى بلده ماشى بالدروس الخصوصيه
واكتشف إنه من غيرها مش هيعرف يدخل الكليه
إشترى الإمتحان والمثالى والمعاصر والمراجعة النهائيه
عشان يجاوب آخر السنة الإجابات النموذجيه
كل ده عشان يدخل الكليه
ودخل كلية فى نظره مش متسميه
وضاع حلمه إنه يبقى مهندس ويركب عربيه
وزاد همه بالمقارنة والمعايرة والملافظ اللى مش سعديه
قضى سنة فى الإسماعيليه
لقى الجامعة مش جامعة والكلية جمعيه
لا مدرجات ولا معامل ولا تدريبات عمليه
لقى مواد متخلفة ومناهج رجعيه
لقى دكاترة ( توحة ) ومعيدين ( أبو دومة ) كل همهم يخلوا الجنيه ميه
حاول يروح عين شمس لكن منعته البيروقراطيه
حول المنصورة وقال هي ديه
حقق حلمك انك تكون ناجح وليك مكانة إجتماعيه
للأسف لقى طرق التدريس هيه هيه
لكن لقى حاجات فى المنصورة مش موجودة فى إسماعيليه
لقى شركات تدريب وندوات ومنح مجانيه
جرب المنح اللى على قد حالته الماديه
لقاها ضحك ع الدقون وكلهم شوية حراميه
حب ياخد كورس فى يات ولا هوريزون لكن هيجيب منين الألوف ديه
إستسلم للواقع وقال أنا ماليش نصيب فى البلد ومصر مش ليا
نجحت فى أولى وتانية ببركة دعا أمى ليا
وقفت مع نفسى أبص ع المستقبل اللى جاى عليا
ودورت فى دماغى مالقيتش أى مادة علميه
قولت تعليم مصر مالوش مستقبل والعيب فى الدولة مش فيا
التعليم فى مصر مش بالشهادة ولا بالكليه
لأنك م الآخر فى دولة متخلفة ورجعيه
لكن بصيت لقيت غيرى دماغه فيها علم وشغال ميه ميه
قولت إيه اللى موجود فيه ومش فيا ؟
يمكن دماغه ذرية !!
شوفته بيعمل إيه عشان اعمل زيه وافوق من حالة الإحباط ديه
لقيته بياخد م الكلية الفهرس اللى يمشى بيه حياته العلميه
بيحضر محاضراته وسكاشنه ومليان طاقة وحيويه
حدد هدفه وقال هى دى حياتى ومافيش غير هيه
مالقيتش اهتمامه ماتش كورة وفيلم واغنيه
لقيت اهتمامه محاضرة وسكشن وكتاب ومقالات علميه
قال أنا هعمل نفسى بنفسى والكلية هتكون سند ليا
فيه اللى قال كلام معقول وميه ميه
وفيه اللى مش عاجبه زى عباس وحسنيه
وقــــــــــــــــــــــالوا
يا عم انت عايش معانا ولا جاى من دنيا تانيه
لو هعتمد على نفسى يبقى إيه لزمة الكليه
ما اقعد جمب أمى أذاكر كتب ودورات تدريبيه
ووفر مصارف مواصلات وكتب ومدينة جامعيه
هدور فى ميكروسوفت وسيسكو والمواقع التعليميه
اتعرف ع البرمجة والشبكات والقواعد البيانيه
ام سى تى اس وسيسكو واوراكل والحاجات الحلوه ديه
اسأل ع المراكز اللى بتدى الكورسات دهيه
وآخد شهادات معتمدة من شركات عالميه
واقعد سنه تدريب فى شركه وهبقى ميه ميه
واسافر اكون نفسى بدل سنين الكليه
وارجع معايا قرشين فى البنك وفيلا وعربيه
ودلوقتى معدل العنوسه 17 فى الميه
يعنى ماحدش قايللى مؤهلات دراسيه
ولأن اللى معاهها المؤهلات دهيه
عارفه انها كوسه وباميه وملوخيه
هتكون طلباتها طاعة ربنا والحب والمال والشخصيه
قولناله ياعم الكليه بتوسع أفاقك الفكريه
قال هقرى كتب فى كل المجالات الثقافيه
هتحرر من قيود بلدى واعمل اللى صح ليا
قولنا فوق ياعم انت داخل ع الليبراليه
قال عشان كده رأيى مالوش دعوة بحد غير بيا
انت عايز توصل لإيه م الحوارات ديه ؟
قال انا نفسى الاقى فى مصر مؤسسه علميه
أساسها العلم وتخريج كوادر بشريه
نفسى فـ حلم العلم والمشاريع القوميه
اللى اتكلم عليها زويل والباز والنخبة المتنقيه
نفسى نقلد ماليزيا والهند والصين وكورٍيا
ودول كتير كانت متخلفة ورجعيه
وخير مثال التجربة اليابانيه
بعد ما دمرتها القنبلة النوويه
نفسى فـ تعليم يخاطب قدراتى ويكلم عقلى ويلائم عصور الدنيا
ياااااااااااااااااااااااااااااااااااااااااااااه
دا انت جيت ع الجرح والحاجات المستخبيه
مش انت لوحدك اللى نفسك فى الحاجات ديه
ملايين نفسهم يخلوا مصر مناره علميه
بس إذا كان وسط كل الظروف المستعصيه
طلع نجيب والقلينى والمشد رموز الهندسه النوويه
طلع مشرفه وزويل والباز وسميره فيزيا وفضا وعلوم ذريه
طلع منها بدير تالت علماء الدنيا
فى الميكرويف والإتصالات الفضائيه
كل دول اتخرجوا من جامعات مصريه
ما قعدوش فى البيت وقالوا مافيش غير مجهوداتنا الشخصيه
وهنروح بعيد ليه .. بص فى الكليه
هتلاقى معيدين زى الفل وميه ميه
أخلاق وعلم وخوف من رب البريه
مامنعهمش الواقع والنظم البيروقراطيه
اخرج بقى وفوق مـ الإحباط والأفكار السوداويه
وسيبك من كلمة .. لا .. اللى مالهاش معنى وتنم عن سخريه
شوفنا كفايه وحركات شبابيه وعماليه
لكن ماعملتش حاجة فـ بلد ديكتاتوريه
ماقدمتش ولا أخرت فـ نظم إحتكاريه
فى بلد وزير تعليمها رئيس سنجور الدوليه
ورئيس الوزراء رئيس النيل فى القريه الزكيه
فى بلد سموا الزنا فيها زواج بين السلطة والماليه
فى بلد المشاريع القوميه لخصخصة كل ما هو ملكيه
فى بلد 28 سنة بتصلح فى البنيه الأساسيه
طب أعمل ايه فى الظروف السوده ديه
برضه إعتمد على نفسك وتوكل على رب البريه
وطاعة ربك دستورك فى الحياه اليوميه
وهنا تبتدى وتنتهى حكاية طالب الكليه

فى حاسبات المنصورة