الصدق والكذب
نشاطركم الأحزان
للفقيد الرحمة ولكم طول البقاء
دموعنا لن تجف حتى نلتقى
إلى جنة الخلد مع الأبرار
خسارتنا بك لا تعوض
ذكراك العطرة تملا قلوبنا
نرثيك وبدموع الحسرة نبكيك
تشرب سيجارة
متشكر بشرب إنجليزى
آدى حال الدنيا .. مين بيخلد
ساب فدانين وفيلا فى المعادى
مراته هتورث ع الجاهز
هى الولية التخينة اللى هناك اللى بتاكل بسطرمة
عينها تندب فيها رصاصة
كانت دايما تقول عليه نسناس
صورتك فى خيالى يا أبى لن تفارقه .. بنتك أمينة
نم بين أذرع الملائكة يا حبيبى ورحمة الله ترعاك .. زوجتك الوفية
الحزن يدمى فؤادى واللوعة عليك تحرقنى .. أختك أزهار
مين اللى بتعيط بحرقة هناك دى
واحدة ماحدش يعرفها ولا تعرفشى حد
بتلطم وتقول بنتى حبيبتى
بتعيط على حاجة تانية
كل واحد بيندب على نفسه
مراته بترقع بالصوت الحيانى
عشان تهضم البسطرمة
يا شيخ حرام عليك
هى دايما بترقع بالصوت الحيانى فى كل مناسبة
لما تضيع منها بكرة الخيط ترقع بالصوت الحيانى
لما يعطل الأسانسير ترقع بالصوت الحيانى
لما تقع كباية ترقع بالصوت الحيانى
بتقول يا سبعى .. ولوطلع من التربة تاكله وحياتك
أعوذ بالله إنت فيه بينك وبينها إيه
أصله كان دايما بيشتكى لى منها الله يرحمه
وكان يهرب وييجى يبات عندى ويقعد طول الليل يندب حظه
ويقول مافيش حد يخلصنى من الوليه النكد اللى بتصرخ ليل نهار دى
أهو ربنا خلصه
الفقى بيقرا وماحدش بيسمع .. وكل واحد بيهز راسه ويقول الله
حتى الفقى عقله فى حاجة تانية غير اللى بيقولها
صدقت .. لو كان عقله فى اللى بيقوله كان خشع شوية
حاجة عجيبة ! والله أنا صعبان عليا الميت
لو كنت أنا الميت دلوقتى كنت هبقى زعلان قوى على نفسى
تصور يعملوا لى شادر ومندبة وملطمة ويوزعوا قهوة سادة على روحى
ومافيش واحد فيهم بيفكر فى روحى
طاب كان لزمته إيه ؟.. ما يدفنونى وخلاص
إيه لزمته المورستان ده ؟
كل واحد عايز يحس إنه زعلان وإنه أدى الواجب
إنت عايز تنكد عليهم ليه يا أخى ؟
إنت عايز تموت على كيفك ؟
المأتم ده معناه كل واحد جاى يموتك على كيفه .. فاهم ؟
لا مش فاهم
أما تموت بإذن الله هتفهم
هكتب وصية إن ماحدش يقدم نقطة قهوة على روحى
شعاع الشمس تجسد فيك .. انت نور حياتى الذى لا يغيب
أنت فى سواد العين .. أنفاسك عطرى .. خيالك غرفتى .. ذكراك تاريخى
لن أنساك أبداً .... حبيبتك الحافظة لعهدك حتى الموت
تفتكر كانت بتحبه ؟
كلامها حلو
مؤكد كانت بتحبه ساعة ما كتبت الكلام ده
لكن بعد كده ما اعرفش
كل شىء جايز يتغير فى دنيا القلوب
بيسموها قلوب لأنها بتتقلب
أنعيش فى كذب دائم ؟
ألا يوجد صدق ؟
بل نحن نصدق دائما ولكنه صدق محدود
صدق لحظتها
كلماتنا عمرها عمر الرسم على الماء والنقش على الرمال
وهى فى العادة صادقة فى حدود هذا العمر القصير إلا فيما ندر
ألا يوجد حب باقٍ ؟
أحياناً
ولكن هذا الحب الباقى فى العادة تعجز عن حمله الكلمات
والذى يحب هذا الحب إذا حاول أن يعبر عن نفسه لا يخرج منه إلا كلام عبيط
أوعبارات بلا معنى
ليست هناك تعليقات:
إرسال تعليق